სამკურნალო მასაჟი
კისერმრუდობა თანდაყოლილი პათოლოგიაა და კისრის ერთ-ერთი კუნთის (სალმის კუნთის) განვითარების დეფექტია. იგი ახალშობილთა 5%-ში გვხვდება. სპეციალისტთა ნაწილი თანდაყოლილი კისერმრუდობის მიზეზად მიიჩნევს მშობიარობის დროს მიღებულ ტრავმას. სხვათა აზრით, პათოლოგიის ჩამოყალიბებაში "ბრალი" დედას მიუძღვის, რომელიც ფეხმძიმობის პერიოდში "არასასურველ" მედიკამენტებს იღებდა, აღენიშნებოდა გრიპის ვირუსი, ან ხშირად ჰქონდა სტრესი.რაც უფრო ადრე შევამჩნევთ კისერმრუდობას, მით უფრო შედეგიანი იქნება მკურნალობა, ამიტომ მშობლებს დაკვირვება მართებთ! როგორც წესი, კისერმრუდობის დიაგნოზის დასმა დაბადებიდან მე-2, მე-3 კვირაზე ხდება. ამ პერიოდისთვის, პატარას კისერზე, სალმის კუნთის ქვეშ, თითისტარისებრი ფორმის შესივება შეინიშნება. შეშუპება საკმაოდ მტკივნეულია, რადგან აღინიშნება სისხლჩაქცევები, სისხლძარღვები გაგლეჯილია. ასეთი შესივება თანდათანობით, დროთა განმავლობაში, ზომაში მატულობს. პატარას თავი დაზიანებული კუნთის მხარეს გადაიხრება, ხოლო კისრის მოძრაობა იზღუდება.თუკი მსგავსი დეფექტი მშობელს უყურადღებოდ დარჩება, პათოლოგია პროგრესირებს: ბავშვის ზრდასთან ერთად კისრის კუნთი მოკლდება, თავი ასიმეტრიულ მდებარეობას მიიღებს და "ზედმეტად" გადაიხრება კუნთის მხარეს. ორგანიზმი ეჩვევა ასეთ ცვლილებებს და დეფექტის კორექცია შემდეგში, პრაქტიკულად, შეუძლებელი ხდება.თუკი პათოლოგია დროულად იქნება აღმოჩენილი და ბავშვს ადეკვატური მკურნალობა ჩაუტარდება, 1 წლის ასაკში, როგორც წესი, კისერმრუდობა ქრება. იშვიათად, შეიძლება მკურნალობას არ დაემორჩილოს. ასეთ შემთხვევაში 3-4 წლის ასაკში ბავშვს სპეციალურ ოპერაციას უკეთებენ.ვარჯიშებივარჯიშის და მასაჟის დაწყება ორი კვირის ასაკიდან შეგიძლიათ. პირველი ვარჯიშები უნდა ჩატარდეს ექიმ-მასაჟისტის მეთვალყურეობის ქვეშ.*დააწვინეთ პატარა ზურგზე, ხელისგულებით თავი ფაქიზად დაუჭირეთ და ნელა გადახარეთ ჯანმრთელ მხარეს, თან შეეცადეთ, ბავშვმა ტრავმირებული მხარისკენ მიაბრუნოს სახე.*ბავშვი დააწვინეთ გვერდზე, გამრუდებული კისრის მხარეს. ხელი თავქვეშ ამოუდეთ და თანდათან გამოაცალეთ, რომ თავი თვითონვე დაიჭიროს.თუ პატარამ ტირილი დაიწყო, ვარჯიში მცირე ხნით შეწყვიტეთ და ბავშვი დაამშვიდეთ.ეს ვარჯიში გაიმეორეთ დღეში 3-4-ჯერ, 4-5 თვის განმავლობაში.ვარჯიშის შემდეგ კეთდება მასაჟი, რომელიც უმჯობესია, თავდაპირველად სპეციალისტს მიანდოთ. მასაჟის მიზანია დაზიანებულ კუნთში ლიმფისა და სისხლის მოძრაობის გაუმჯობესება, მისი მოდუნება, ხოლო საპირისპირო მხარეს -კუნთის სტიმულაცია და ტონუსი. პროცედურა 10-15 წუთს გრძელდება. მკურნალობის კურსი 15-20 პროცედურას მოიცავს. უმჯობესია, მასაჟთან ერთად ფიზიოპროცედურებიც ჩატარდეს.გარდა ამ კომპლექსისა, აუცილებელია, პატარას ძილისა და სიფხიზლის დროს შეუქმნათ სპეციალური პირობები. კერძოდ:*შეუკერეთ სპეციალური კისრის დამჭერი, თავი სწორად რომ ეჭიროს და არა გვერდულად. ამისთვის დაზიანებულ მხარეს კისრის დამჭერი უფრო მაღალი უნდა იყოს, ხოლო ჯანმრთელ მხარეს იკვრებოდეს.*შეუკერეთ ბალიში-რგოლი, რომელიც ჯანმრთელ მხარეს უფრო მაღალი იქნება.*საწოლი ისე დადგით, რომ მშობლების დანახვისთვის ბავშვმა თავი დაზიანებული კუნთის საპირისპირო მხარეს მოაბრუნოს. სინათლე და სათამაშოებიც ჯანმრთელ მხარეს უნდა იყოს.*პატარას ხელში აყვანისას შეეცადეთ, იგი ვერტიკალურად არ დაიჭიროთ -ამ შემთხვევაში კუნთზე ზეწოლა იზრდება.ყოველივე ეს აიძულებს პატარას, არ დაზოგოს დაზიანებული კუნთი, რითაც მას თვითონვე ავარჯიშებს.